緣分早注定 時光倒流7年
姚錦成嘅女友Kelly，今年將繼續到場為阿成打氣，仲準備舉牌支持：「其實個牌上年就整咗，亦有帶入場，但因為我哋坐喺球員休息席，舉牌打氣會好『樣衰』，所以最終只係得個拎字。不過今年我會着住阿成着過嘅港隊波衫，再舉埋個牌為佢加油！」
拍拖前曾同台領獎
阿成有女友打氣就梗係Sweet爆，但原來相識兩年嘅佢哋，緣分早喺7年前就開始。Kelly話：「拍拖後有次我哋傾開，發現原來大家都係06年屈臣氏學生運動員獎得主，並一齊出席當日頒獎禮。我哋再翻查相片，喺當日600幾位得獎者中，竟然我哋係企喺旁邊，真係講都唔信！」
講番相識過程，阿成形容都幾《那些年》：「兩年前嗰時大家都係讀教育學院，有次陸運會咁啱佢由英國交流返嚟，我一見到就覺得佢『好吸引』，之後就搵朋友嘅朋友，先add佢嘅facebook，咁就識到呢位游泳隊隊長師姐嘞！」
Kelly就話對阿成第一印象係佢好傻仔，但佢正正就係鍾意佢「傻更更」，結果咪一拍即合囉！