3個喇沙仔齊齊欖上身

欖球風潮吹到學界,來自喇沙書院校隊的「3個欖球少年」陳俊樂(Ryan)、李文傑(Patrick)及方啟全(Samson)均迷上這項埋身肉搏的競技,外人睇來以為打Rugby好粗魯,但其實要打得好,內裏有很大學問,要鬥智鬥力才能達陣取分,就是這股英雄感驅使3人不怕受傷戰鬥下去。

喇沙欖球隊成立數年,每位球員開始接觸欖球的原因各有不同,好似陳俊樂就是被朋友感染下而打Rugby,他不諱言打Rugby感覺「好型」,是最初吸引他參加的原因,自10歲加入第一猛虎欖球會的Ryan說:「其實以前我打籃球,但見到欖球員玩起來『好有型』,所以跟住玩,結果就被欖球所吸引。」

至於李文傑在中一時和朋友加入球會,一直玩到現在:「問我沉迷欖球的原因,我最享受在球場上奔跑得分的快感,以及達陣取分的成功感。」身兼田徑隊、手球隊、排球隊員的方啟全承認是因為「貪新鮮」才加入欖球隊:「打欖球跑動多,又有助我練力量、速度。再加上打慣手球的關係,所以都算容易上手,最重要是由於多消耗體力,仲幫到我減肥添。」

英雄感驅使 受傷當食生菜

打欖球時常有身體接觸,少不免會受傷,3位大男孩直言打波時不會顧慮太多,受傷「當食生菜」。Patrick表示曾經因為攔阻對手時動作不對,導致頸後軟骨移位。Ryan以前被對手撞傷膝頭肌肉,足足幾個月不能打波,但他笑言:「係咁o架喇!最緊要唔好毀容就得!」

圖/文:Riddle