波神添風流帳
米高佐敦（Michael Jordan）喺NBA地位至高無上，不過非常爛滾亦係不爭嘅事實，最近又被揭發一筆風流帳。即將喺4月再做老襯嘅「波神」，昨日被揭發多年前一單偷食醜聞，佢個陳年舊愛仲搬埋私生子出嚟要求做親子鑑證，誓要追番呢筆風流帳鑿米高佐敦一筆！
法院提訟求親子鑑證
據美媒《TMZ》爆料，「波神」舊愛Pamela上月7日向喬治亞州富爾頓縣法院提出訴訟，自稱喺1995年同米高佐敦發生性關係後懷孕，翌年6月就生咗囝囝Taj，要求法院進行親子鑑證，證明「波神」就係Taj嘅親生老竇。Pamela要求獲得Taj嘅全部監護權同撫養費之餘，仲希望法院能夠判Taj可以用番「Jordan」呢個姓。
16歲阿Taj網上叫老竇
現年16歲嘅Taj亦喺呢件事上出埋力，日前更拍片掟上YouTube，直接叫米高佐敦做老竇，又話好想同「波神」見吓面，擺明狂Sell溫情。不過話時話，Taj同米高佐敦真係成個餅印一樣，睇怕「波神」今鋪吟詩都吟唔甩啦！正所謂人不風流枉少年，現時貴為山貓班主嘅米高佐敦，後生嗰陣的確係好爛蒲，但家陣已經修心養性，仲準備喺4月同古巴籍名模伊維狄拉埋天窗，呢個時候先畀人翻舊帳，Pamela真係唔知攞景定贈興嘞！