大帝唔激得 拒玩鋤樽騷

韋迪(Dwyane Wade)將投CBA懷抱?熱火巨頭韋迪近日被踢爆簽約「李寧牌」時,附帶一項收山前要到中國打CBA的「秘密條款」,若然事件屬實,必定是亞洲籃球躉佳音。另外,熱火「大帝」勒邦占士(LeBron James)唔肯玩明星賽的入樽賽被「咬住唔放」,一眾傳媒及球迷都強烈譴責「大帝」寧願在無關痛癢的賽前練習Show Off都對入樽賽「見死不救」,有欠大體!

近年大批NBA球星紛紛到神州發展,馬貝利(Stephon Marbury)、亞連拿斯(Gilbert Arenas)、「T-Mac」麥基迪(Tracy Mcgrady)趁收山前到市場龐大的CBA掘金。原來,年屆31歲的韋迪簽約成「李寧牌」代言人時,其10年價值1億美元的贊助合約中,就有一項秘密條款,就是寫明「閃電俠」必需在結束NBA生涯後,到CBA効力至少一個球季。雖然韋迪到時可能已經「四張嘢」,不過以他的冠軍級技術及號召力,必定能搞慶國內球市。

至於熱火近期有新搞作,於賽前投籃練習時加插入樽環節,基斯安達臣(Chris Andersen)及查馬斯(Mario Chalmers)都有份湊熱鬧,就連球會都透過官方twitter呼籲球迷提早入場欣賞鋤樽騷,令比賽未開波已經人山人海。當中占士就屬全場焦點,繼周日飛過6呎10吋的劉易斯(Rashard Lewis)入樽後,前日就以一記高難度胯下鋤樽贏盡掌聲,片段熱爆互聯網。

練波入樽反被球迷指摘

不過,就有偏激fans向勒邦占士「興師問罪」,全明星周末雖然已經告一段落,不過Fans仍為「大帝」拒絕參戰入樽賽發炮,指占士近期頻頻於賽前「騷哥利」,當初都不肯參加全明星周末「Slam Dunk」,令球迷大失所望,指摘他「又要威又要帶頭盔」:「占士想話畀人知自己入樽勁,但又驚贏唔到入樽賽會冇面!」這位熱火Icon難忍譴責,昨日發霉氣表示取消鋤樽騷環節,勁小家!