大帝情變搭上Happy！
「大帝」未「結」先「分」？原本打算今年9月做老襯嘅勒邦占士（LeBron James），最近幾個星期未有同未婚妻莎雲娜（Savannah Brinson）公開亮相，呢對青梅竹馬嘅愛侶喺全明星周末更「分頭玩」，美媒昨日仲踢爆「大帝」搭上一名神秘金髮女郎，同莎雲娜似乎緣已盡！
「秘女」戴冠軍指環玩自拍
熱火上月造訪白宮會見美國總統奧巴馬，個個球員都攜眷出席，惟獨占士一支公到場，當時已經惹來美媒議論紛紛。《MediaTakeOut》尋日踢爆莎雲娜上周冇出席全明星周末捧「大帝」場，反而同朋友去咗加州卡塔利娜島度假，至於占士就被目擊在休斯敦一間夜店攬住一個叫「Happy」嘅金髮女郎，呢個神秘女郎更戴上占士嘅冠軍指環玩自拍，如此貴重嘅指環都畀佢玩，證明「Happy」同「大帝」關係非比尋常。
感情生活冇影響占士嘅表現，佢昨日交足貨攻入全場最高嘅26分，帶領熱火作客以86比67大炒公牛連贏9場，個勢猛成咁，明天造訪76人當然可以秤先，熱火讓5.5分要上盤。
（周日早上8時30分開賽）