白必圖愛女打排球壓爆假胸

【本報綜合報道】巴西經典「夢幻組合」羅馬里奧同白必圖名震一時,不過佢哋踢波就叻,但似乎教仔女嘅功力就差得遠。其中白必圖愛女斯蒂芬尼做Model學人去隆胸,卻於公開場合壓爛「假波」,大出洋相;羅馬里奧囝囝羅馬連奴掛住夜蒲荒廢事業,淪落到要踢巴丙!

白必圖球員時代作風低調,不過佢嘅仔女始終想做風頭躉,其中19歲細仔馬菲奧斯代表巴西出戰南美U20錦標賽,落得包尾出局已經夠瘀,佢個囡囡斯蒂芬尼成日發模特兒夢,21歲女已經幫雜誌拍過全裸、露股寫真,雖然有靚樣兼1米81高挑身材,但斯蒂芬尼仍決定去隆胸博上位。

據巴西傳媒爆料,斯蒂芬尼唔知係咪隆胸後自信心爆棚,日前出席一個排球賽事期間,一次飛撲落地後竟然傳出「呯」一聲,斯蒂芬尼胸部入面個矽袋竟然被壓爆,需要立即送入醫院修補「損毀」部分。白必圖就不滿話:「我真係唔明,我哋全家都係信教,Model唔應該係佢嘅事業。」

羅馬里奧之子淪落巴丙

至於羅馬里奧囝囝羅馬連奴就孝順得多,可惜畀個老竇帶壞,上年哥迪奧拿原本畀羅馬連奴踢巴塞B隊,點知羅馬里奧就帶佢返巴甲踢母會華斯高,最弊係喺巴西兩父子經常結伴夜蒲,就連朗拿甸奴都帶呢個細姪去玩,搞到羅馬連奴表現一落千丈,終於畀華斯高趕走。

之後喺老竇搭路之下,羅馬連奴終改投巴西丙組嘅巴西人,可惜處子登場即輸波,巴軍教練費南迪斯仲直斥羅馬連奴表現唔掂,呢勻真係(火羅)到爆!