大帝偷追阿拉巴馬小姐
剛躋身全明星賽東岸正選的勒邦占士名成利就，即使訂咗婚都大把狂蜂浪蝶殺埋身。不過，「大帝」貴為NBA巨星，揀女自然要門當戶對！同C朗拿度傳過緋聞嘅米內蒂有前有後應該適合啦？點知呢位意國靚女日前在邁阿密海灘慘食「大帝」檸檬，美媒踢爆原來呢位NBA巨星心有所屬，正力「追」阿拉巴馬州小姐Katherine Webb，明撬Katherine嘅「大茄」男友麥卡朗牆腳！
話說米內蒂月初到邁阿密度假，更以性感泳裝Look去海灘曬太陽，同一時間，熱火球星占士突然出現，米內蒂即時搔首弄姿，一個箭步衝去搵「大帝」吹水兼乘機影相同攞簽名，點知講未夠兩句，占士就叫兩位保鏢將佢「革扯」，搞到米內蒂認真冇癮！
幾秒驚艷變twitter追隨者
米內蒂曾經幫意大利前總理貝魯斯干尼掌管「後宮佳麗」，上年年尾又被指同C朗喺馬德里一間酒店偷情，私生活混亂不堪，難怪「大帝」唔理你啦！講真，占士其實鍾意有啲Pure嘅女仔，Katherine就係佢杯茶嘞！呢位2012年阿拉巴馬州小姐，本月8日出席全美大學美式足球賽冠軍戰，幫効力紅潮嘅男友麥卡朗打氣，剛好電視鏡頭捕捉到佢喺觀眾席個緊張樣，就係呢幾秒令佢人氣急升，短短一晚twitter就多15萬位「追隨者」，一夜成名。
打殘湖人K.O.票王高比
呢15萬位新「追隨者」當中，美媒發現占士榜上有名，更有消息話雙方已經互傳短訊。有記者將消息通知麥卡朗，呢位四分衞當堂打個突，可能真係驚「大帝」會搶走自己女友！年尾就做老襯嘅占士，係咪想趁婚前放肆一下真係得佢自己知，而呢位熱火球星今季表現勇銳，真係情場球場皆得意，雖然佢喺昨晨公布嘅全明星賽投票輸畀「票王」高比拜仁，但昨日就喪入39分帶領熱火作客以99比90擊敗湖人，鋒芒完全蓋過「小飛俠」，真係乜氣都順番啦！