ＮＢＡ明星賽波衫航天Feel
2013年NBA全明星周末，下月15至17日喺航天城休斯敦舉行，《體育畫報》近日率先披露全明星球員戰袍。休斯敦係美國著名航天城，今屆全明星喺呢度舉行一定要體現地方特色，「航天」元素明顯融入呢款戰袍嘅設計，其中將充滿速度感嘅噴射機以圓點點綴天空嘅形式出現，認真特別。
大帝成最年輕二萬分先生
同時，今屆全明星嘅球員熱身衫會有所謂嘅「飛行員風格」。屆時每位球員都會擁有獨一無二嘅熱身衫，衫上面附有球員職業生涯嘅種種成就，包括全明星參與次數、全明星MVP獎項、NBA總冠軍和常規賽獎項。不過，《體育畫報》記者即時聯想到湖人球星高比拜仁嘅熱身衫會否有足夠空間容納佢「水蛇春」咁長嘅榮譽呢？
講起高比，其史上最年輕20,000分先生嘅榮譽終被打破。熱火昨日作客以92比75擊敗勇士，勒邦占士喺第二節跳投得分，從而超越高比成為NBA史上攻入20,000分最年輕嘅球員。高比係喺29歲112天先突破20,000分大關，而「大帝」尋日只係28歲17天，佢今仗同時造出生涯第5,000次助攻，成為史上第13位同時交出20,000分和5,000次助攻嘅球員。