招積湯美當費達拿冇到
上周捧走悉尼網賽後誇言「無人能阻」的澳洲新星湯美，昨日在澳網男單次圈，即使幾經艱苦，打到第8次決勝分才能驚險地以6比7（4）、7比5、7比6（3）、7比6（8）力壓德國的白蘭斯，但依然相當招積，有新女友撐場的他賽後強調自己「弗爆」，闖入32強後力足挑戰瑞士天王費達拿。而「細威」腳傷已無大礙，再次派蛋闖入女單32強，並坦言已向家姐「大威」教路對付舒拉寶娃。
（now 671今早8時直播）
費天王都阻我唔住
曾經試過危險駕駛、打架鬧事的湯美，被傳媒稱為「問題少年」，但同樣也是澳洲的網壇希望，去年帶同模特兒女友Donay Meijer參賽，今年已經「換畫」、新歡是讀法律的Chelsey Grbcic，據悉Chelsey是前克羅地亞黃金海岸小姐，昨日看見愛郎贏波後亦相當雀躍。20歲的湯美賽後狂言：「我冇想過佢（白蘭斯）今日打得咁好，對我的確有啲難度，佢今日嘅表現實在令我驚訝。」這場激戰花了2小時55分鐘，湯美共發出26個「Ace」。
在40度高溫下比賽，湯美對於自己能夠連續3年躋身第3圈表示滿意，下仗將面對「二哥」瑞士費達拿，爭逐男單16強席位仍然信心爆棚：「當然佢係一個偉大嘅球手，若有機會對佢當然好，佢舊年比我好好多，但今年我都係一個出色球手，所以呢場比賽會幾有趣。」早前湯美在悉尼賽奪標後曾高調表示「無人能阻」，包括世界第一（因為祖高域日前在賀文盃曾負他），更自言狀態「托弗」，爭取打入世界Top10，當時費天王曾發言喻這位澳洲小子勿太天真，看看費天王如何出招「教訓」這位「招積仔」，令他們在第3圈相遇增添話題性。至於費達拿則輕鬆以6比3、6比4及6比4擊敗老對手俄羅斯的迪維丹高，對於將面對澳洲新星湯美，費達拿只輕輕帶過：「佢最近進步咗好多，我好期待呢場比賽，將會幾難打。」
細威晉級 彭帥出局
女單方面，42歲日本「老將」伊達公子再造神話，以6比2、7比5擊敗以色列的皮雅進身第3圈，而中國金花彭帥則以5比7、2比6不敵俄羅斯美女姬莉蘭歌次圈止步，在賽後記者會一度哭成淚人。至於上一圈扭傷腳的「細威」S威廉絲則輕易以6比2及6比0淘汰西班牙的馬古露莎，下一圈對日本的森田由美，對於家姐V威廉絲今日與舒拉寶娃對戰，「細威」稱：「佢完全可以應付，我覺得Venus冇嘢輸唔起。」
本報綜合報道