第29屆非國盃如箭在弦，被視為奪標熱門之一嘅加納國家隊，其箭頭基恩卻表示唔會再為「黑星」主射12碼，點解？原因係聽阿媽話囉。據報基恩媽喺過身前，曾經強烈要求囝囝唔好當劊子手，咪睇基恩惡形惡相咁，其實佢不知幾孝順，既然阿媽叫到，呢位加納隊長惟有遵從。
事實上，12碼對於基恩嚟講可謂不堪回首，佢喺2010年世盃半準決賽對烏拉圭加時最後一刻嘅極刑宴客，令加納被逼拖到互射12碼，雖然佢之後射入其中一粒，卻未能將功補過，最終慘遭淘汰，錯過成為首支進身世盃4強嘅非洲球隊，當時基恩喊到收唔到聲，難怪阿媽肉赤個仔，叫佢唔好再操刀喇。而加納曾喺92年非國盃決賽嘅馬拉松式點球大戰，以10比11輸畀科特迪瓦，睇嚟12碼先係「黑星」嘅剋星喎。