其實NBA球星太座的確唔易做！事關班球星係「有米之人」，自然唔少狂蜂浪蝶埋身。好似2010年「新人王」泰拉基伊雲斯咁，一副戇直樣子但照樣「迷倒」不少美女，近日更被傳「搞大」艷星Ashley Logan個肚，對唔住青梅竹馬女友不特止，仲懷疑做咗「行家」巴朗戴維斯同貝理雅「襟兄弟」！
美媒《fullcourt》爆料，一個叫Ashley Logan嘅惹火艷星自爆懷孕，日前喺twitter上載圖片，話BB個老竇好高、好有才華，結尾仲加咗一個王冠Icon，唔少傳媒都揣測，呢個Icon就係暗示効力帝王嘅伊雲斯。
Ashley曾搭上饒舌歌手Red Cafe同DJ Whoo Kidd之外，盛傳仲同前紐約人控衞巴朗戴維斯及馬刺中鋒貝理雅有一手。Ashley密友話佢今次唔肯定經手人是誰，伊雲斯今鋪隨時被屈食死貓！
查實伊雲斯有個拍拖多年的女友Corina，呢位前帝王啦啦隊索女目前自己開班教小朋友跳舞，又清純又聽話，想不到伊雲斯唔珍惜！
講開帝王，佢哋大老闆馬洛夫家族準備賣盤，以破聯盟紀錄嘅5億美元（約39億港元）將球會賣畀以漢臣同保曼為首一個西雅圖財團，一旦成事，帝王最快會在來季搬竇到西雅圖，薩克拉門托嘅球迷當然唔Happy！