【本報綜合報道】ＮＢA群星唔使比賽，當然把握機會歡度元旦，湖人當家球星高比拜仁同老婆雲妮莎勁Sweet，以情侶黑色套裝亮相並於紐約手拖手行街街，惹來大批市民圍觀。而雷霆眾星亦「唔執輸」，元旦日開P玩到癲，當中以「怕醜仔」杜蘭特最出位，兩杯落肚後突然好大膽，主動搶咪上台大展歌喉。至於熱火兩巨頭保殊及韋迪亦攜眷出席晚宴，但講到元旦日主角，肯定非「大帝」勒邦占士莫屬！
有《ESPN》記者收到風，指「大帝」即將結束愛情長跑，落實今年9月與女友莎雲娜拉埋天窗，事件已獲該位熱火Icon證實，但婚禮地點在邁阿密抑或「大帝」家鄉阿克倫市就仍未揭盅，相信「大帝」結婚細節將會係2013年一眾媒體的焦點。