球季漫漫長路，無論係足球抑或NBA賽事，作為一名教頭，經常要面對如何運用手頭上資源的問題，球迷梗係想場場都有球星睇喇，但有遠見的領隊絕對唔會咁做，在審時度勢下，季初或季中賽事收起主力，甚至導致輸波，亦在所不惜。
好似NBA西岸勁旅聖安東尼奧馬刺，由於教頭普波維治在作客大戰邁阿密熱火之役，讓4名主力輪休唔使隨隊出征，當中包括鄧肯、柏加及真路比利等球星，搞到NBA總裁史端嬲到震，話普帥違反聯盟規則，罰咗佢成25萬美元（約194萬港元）罰款，都咪話唔甘。
其實馬刺近期惡戰頻頻，陣內又多老將，以傷疲為由收起主力，Peter認為普帥咁做無可厚非，而足球名帥費格遜及莫連奴總能洞悉形勢，不時採用輪換制，老費唔會常常用晒朗尼、尹佩斯、查維亞靴南迪斯三大星級前鋒攻堅，始終球員唔係機器，場場都打，好易搏殘，寧願在季初階段失啲分畀你鬧，等到球季殺入直路時，一班主力叉足電全力一拚，方為致勝之道。
金句：to play最佳球星，or not to play
黃興桂