公鹿怪招劏牛
在NBA常規賽已遭逢「三連敗」的公鹿，為求贏波真的無所不用其極，球隊上下竟然使出那渣「屎坑橋」！好似中鋒古頓昨天竟用「波飛」做餌，引誘公牛球迷做叛徒，將愛隊波衫掟落屎坑，至於教練史卡奧斯更施展「屎到爆」的演技催谷球員狀態，最後公鹿戲劇性以93比92險勝公牛，估唔到「屎坑橋」真係Work喎！
就在公鹿作客公牛一役之前，公鹿球員古頓透過twitter大玩派波飛遊戲，呼籲一眾「牛躉」將愛隊波衫掟落屎坑，最快上載「傑作」的幸運兒即可獲得兩張免費波飛，結果不消18分鐘便有一位公牛叛徒狠下毒手，將軒域治球衣掟落屎坑。
美媒寸史卡奧斯戲屎
另邊廂，公鹿教練史卡奧斯昨仗大刀闊斧變陣出擊，雖然公鹿戰至第3節尾段足足落後27分，不過史卡奧斯就及時使出撒手鐧，突然《幽靈車神》上身，狂「Chok」Hit爆漫畫主角Johnny的招牌惡樣加手指指動作，於場邊一味靠嚇鬧爆球員，豈料這招竟然奏效，連開季表現低沉的伊耶蘇華都鹹魚翻生，貢獻今季得分新高18分，成功協助球隊收復失地並以1分之差反勝。對於被美媒批評動作生硬兼演技屎爆，公鹿教練史卡奧斯一於少理，賽後繼續靠嚇：「我喺第4節派晒第二梯隊上陣，因為真寧斯同艾利斯打得唔好，佢兩個係球星又點？表現差一樣要坐冷板！」
此外，一向貼緊潮流的退役球星奧尼爾，近日與珠寶公司Zales合作，推出一系列包括頸鏈及手鏈等自家品牌的珠寶飾物，最貴貨品亦只賣449美元（約3,479港元），擺明行平價路線。「巨無霸」昨於紐約舉行簽名會造勢，期間更落手落腳做售貨員冧客，相當落力！
本報綜合報道