運動助孩子建立正確價值觀
作為過來人，洪松蔭認為「踩車」不但可以強身健體，又可作為親子活動，然而最關鍵的是可透過踩單車，讓孩子建立正確價值觀，阿松深信年輕人只要有正確的價值觀，對讀書、成長以至將來投身社會都有幫助。本身有一子一女的阿松一直都鼓勵孩子參與運動，自言與目前就讀華仁書院F2的囝囝更加與他無所不談：「我哋依家成日都會一齊踩車，踩車過程中大家會傾好多嘢，講吓學校、講吓生活、甚至將來同理想。」
從小培養終生受用
阿松憶述：「囝囝3歲嗰陣我帶佢去行山，由薄扶林行到山頂，起步前我指住終點畀佢睇，佢話冇可能行到咁遠，但我話『我哋陣間個半鐘左右望番起點會好開心，呢段過程我哋唔會抱你，但會鼓勵你、獎勵你』，就係呢個過程，就可以讓小朋友自己感受流汗辛苦想放棄到堅持直至完成的歷程。有過呢啲磨練，將來人生路上遇到困難挫折，都識點去應對同克服。」
阿松補充建立正確價值觀並非一朝一夕，而是要自小培養，而最佳的方法就是透過運動：「囝囝由小一至小五每年都考第3第4，佢成日話要學家姐考第1，我哋話要好似行山咁，要靠自己努力先至可以達標，結果佢小六嗰年考到第1，舊年F1更係全級第1，依家佢好獨立，所有嘢都可以自己安排，我諗呢啲都係運動畀到佢嘅得着。」