上星期六係中國男子籃球職業聯賽（CBA）開鑼嘅大日子，但香港未有任何電視頻道直播，只能上網尋找睇波嘅頻道，實在有啲可惜。
CBA近10年發展已到達大熟大勇階段，除香港籃球迷非常熟悉嘅羅意庭已第三年効力福建外，今季更有三位曾在NBA叱咤一時嘅球星同時獻技，分別係上季帶領北京贏得首個CBA總冠軍嘅馬貝利、効力青島嘅前NBA得分王麥基迪同効力上海嘅「0號探長」亞連拿斯，可惜亞連拿斯對北京嘅開鑼戰僅為上海上陣6分鐘就傷出。
星期日睇咗福建對青島場波，本來預期麥基迪呢位兩季NBA得分王會上演個人騷，因為CBA經常有外援可以一場波入50甚至60分，最終麥基迪交出34分、9次助攻同8個籃板嘅「準三雙」。喺賽事所見，麥基迪除咗得分仲做咗好多機會畀隊友，對球隊作出好大嘅貢獻，美足不足係完場前被對手成功偷波兼絕殺，未能喺CBA旗開得勝。
我知香港唔少球迷都好似我咁去facebook或者社交網搵睇CBA嘅渠道，今季CBA真係星光熠熠，除上述三位球星外，仲有易建聯回歸，總計今季共有28位曾經打過NBA嘅球員落戶CBA。能夠簽入咁多前NBA球員，當然係同中國球隊富起來有關，記得去年NBA封館期間，簡安馬田、韋遜贊特拿同JR史密夫先後來華，佢哋嘅年薪動軏200至400萬美元，能夠引入呢班高質素外援，無疑令CBA水平提高咗好多。
我敢講今日CBA嘅水準已超越菲律賓同南韓，成為亞洲首屈一指嘅聯賽。如果有香港電視台肯直播或者轉播CBA賽事，實屬籃球迷之福！
蔡芳裕