中國喺個別奧運項目擁有壟斷地位，例如跳水、羽毛球、乒乓波，其中乒乓波嘅情況最嚴重，自04年雅典奧運以來嘅3屆奧運12面金牌，中國贏咗11面，唯一輸波係04年奧運男單決賽「千年老二」王皓輸畀南韓柳承敏。近年中國乒團贏到開巷，贏到麻木，中國百姓提唔起興趣睇波，見到咁嘅情況，國乒主帥劉國梁提出反問：「如果國乒成績差番少少，咁又得唔得先？」
近日上海搞咗場中國乒團對世界聯軍嘅團體賽，結果唔使多講，梗係中國男女乒團全部橫掃啦！不過一場贏硬嘅賽事等同趕客，據講上海比賽場地周圍貼晒海報，再喺人流旺盛地點廣為宣傳，但並未引起太多人關注，就好似三色台嘅慣性收視，睇到你冇晒feel，要熄電視出街搵節目。
贏波都唔啱？對於付出青春血汗嘅中國乒球選手未免太唔公平。不過現實就是如此，怪只怪世界聯軍太屎波，跟唔上中國乒團嘅節奏同步伐，國際乒聯賽制改完又改，近年大賽決賽始終都係中國對中國，張繼科對王皓王、李曉霞對丁寧，邊個攞金牌？外國人唔關心，即使係中國人，除咗佢哋圍內班親朋戚友緊張之外，Who cares？
張繼科定張繼聰，叮噹定丁寧，大家都搞唔清，奧運乒球變成中國圍頭賽，非中國選手只能爭銅牌，正如當年馬王「精英大師」一出場，同場對手只能爭Place，搞到熱W派10蚊零5毫又係搵嚟搞，所以劉國梁話國乒咪再金牌掛帥，對於拯救中國乒球，係有佢嘅道理。
波男Style