李英健:囡囡打氣令我更快
香港沒有賽車場，全職賽車手在這個城市可說是「稀有動物」，能夠得到大車廠賞識，靠賽車來追尋夢想養妻活兒更是絕無僅有，幸好我哋仲有Marchy李英健。由小型賽、F3、F1試車手，到近年轉揸GT，李英健20多年來對賽車的堅持，終獲德國汽車品牌Audi（奧迪）招攬成為旗下車隊一員，再於今年創辦的奧迪R8LMS盃（奧迪盃）攞埋總冠軍，為香港爭光，個人賽車事業亦踏入新里程。
Marchy受到賽車手父親影響，8歲開始接觸賽車，少年時期到過日本及法國受訓，是香港以至中國第一個方程式賽車手，05年更獲得F1試車機會，雖然最終與F1擦身而過，但他並未放棄，更在近幾年轉攻高性能賽車賽事，終於在今年轉型成功，他說：「經過無數次試車及比賽，不斷累積經驗，我以表現來證明自己是一位有實力的車手，奧迪盃總冠軍就是我轉型成功的最佳憑證。」
轉揸GT見證亞洲賽車起飛
說起這幾年的經歷，Marchy表示自己很幸運，剛好遇上亞洲賽車起飛的黃金期：「近五年是亞洲賽車興起的黃金期，特別在中國內地，參加賽車運動的人愈來愈多，這幾年我由方程式轉揸GT，參加過亞洲GT賽、GT3賽、在亞洲舉行的勒芒洲際大獎賽等，見證亞洲賽車運動的興起。」
廿四孝老竇最愛家
賽車手離開駕駛座都係普通人，一樣要成家立室同生活，李英健已經結婚，有個四歲女兒，女兒出世時正是他轉型的關鍵時刻，他說比賽時女兒給他無比動力：「很多車手結婚生仔後成績會差咗，但我就剛好相反，囡囡出世後仲快咗添！」
自從女兒出世後，Marchy成為廿四孝老竇，每每比賽結束後立即回家照顧妻女，即使出外比賽，只要有機會就會帶埋老婆同女兒一齊出發，讓她們一起睇賽車。今年「奧迪盃」十二站賽事，他讓妻子跟足全程，女兒亦在部分賽事到場，為爸爸打氣，他說：「有她們在場，我得到更多鼓勵，速度真係比以前快。」
受Marchy薰陶，女兒見慣賽車，有很多車仔玩具：「囡囡仲未識分賽車類型，但就識分顏色，不過仲未知佢有冇賽車天分，應該都有啲遺傳啩。」
李英健的10件事
1. 出生日期 : 1976年9月2日，現年36歲
2. 外號 : 「港版舒麥加」
3. 家庭狀況 : 已婚、有1女
4. 首次接觸賽車 : 8歲
5. 首項冠軍 : 1990年香港小型賽車少年組冠軍
6. 征戰澳門成績 : 3次、最佳成績2002年第7名
7. F1試車 : 2005年擔任意大利文諾迪車隊試車手
8. 轉戰GT : 2007年參加保時捷亞洲盃
9. A1GP : 2008年加入A1GP中國隊
10. 奧迪盃 : 2012年參加奧迪R8LMS盃，獲得全年總冠軍