香港又申辦亞運？早前亞奧理事會終身名譽副主席、中國體育界人士魏紀中失驚無神爆出香港應該申辦2023年亞運會，仲要配合到時已經通車嘅港珠澳大橋，同澳門、珠海一齊搞，不過呢件事仲處於亞奧理事會內部吹水階段，香港體育界暫時只得細霍一個有反應，要凝聚社會共識有排未到碇。
申辦亞運係一件民生大事，做乜依家搞到好似深夜電視疲勞轟炸廣告咁不停Loop（循環），提出申辦↓體育界支持↓議員同各界反對↓申辦被ban↓然後再提出申辦……就係咁，申辦亞運變成一個不停循環嘅話題，但如果長此下去，好快就會令你大腦無意識中記住，情況類似「××迷你倉」個電話號碼，又或者MC JIN露腩大嗌「爽呀！好爽呀！」嗰支沖涼液，不停Loop，係咁洗你腦。
其實香港辦亞運構思唔錯，尤其魏紀中話香港拍住澳門同珠海一齊搞，再預埋深圳嘅世界大學生運動會用完之後丟空養老鼠嘅體育設施，將內地人經常掛在口邊嘅「一小時生活圈」，變成呢個「一小時體育圈」嘅申亞構想，最符合香港人搭棚籌旗ＡＡ制嘅生活習慣。
兩年前香港申亞被ban，反對理由係「好大喜功」、「應先解決民生問題」同埋「缺乏長遠體育政策」，其實三項理由都唔關事，佢哋最主要都係搵啲嘢嚟鬧政府啫，而且香港人講到尾都係講錢，如果辦亞運係有錢賺嘅話，大把人舉腳支持啦！