【本報綜合報道】「禪師」積遜同湖人好事近！美國傳媒報道，湖人執行副總裁占巴斯親自去到積遜屋企傾再度合作一事，「禪師」對於今次談判感到非常滿意，有可能接受一份為期2年嘅合約重返湖人，雙方只係差合約上嘅細節未傾好，如果一切順利的話，積遜有望星期三湖人主場對馬刺正式執教。
據《橘郡紀事報》報道，喺正式解僱米克布朗之後，湖人尋帥工作立即啟動，當然，首選目標梗係積遜啦，起碼球迷唔會抗拒。湖人執行副總裁占巴斯同總經理古卓克喺當地時間星期六親自去到積遜屋企拜訪，同呢名名帥商討再次合作相關事宜。雙方談判氣氛愉快，積遜對於湖人嘅誠意感到滿意，雙方有望達成一份為期2年嘅合約。湖人用乜嘢條件吸引「禪師」目前尚未曝光，雙方仲有一啲細節需要商議，積遜和湖人方面會再次進行談判。
如果一切順利嘅話，積遜最快可以喺星期三湖人與馬刺一戰中正式復出指揮比賽，但考慮到積遜同湖人仲未正式傾掂細節，因此積遜隨時要等到下周六，湖人主場對太陽先至執教。另外，湖人同米克布朗簽咗一份4年1800萬美元（約1.4億港元）嘅合約，湖人現時要支付米克布朗超過1000萬美元（約7750萬港元）嘅違約金，可能因為呢筆巨額違約金，米克布朗被炒後心情並冇受太大影響，佢去到快餐連鎖店食嘢時，仲微笑同球迷合影。