米克布朗新球季執教湖人隊短短5場內便被炒魷魚，絕對唔意外。當呢隊粒粒皆星嘅球隊曾經連輸11場（連同季前賽），開季1勝4敗，西岸包尾，呢個成績對立志要拎總冠軍嘅湖人嚟講，絕對絕對係唔合格。
場外，當有球迷大叫「有咁樣嘅陣容，畀我阿媽帶隊都會拎總冠軍」，甚至有唔理性嘅球迷向布朗個仔發出死亡恐嚇，你就知道布朗呢個時候落台，可能係上帝畀佢一份禮物，始終命仔緊要嘛！
場內，布朗有三大死症，係令佢落台嘅導火線：
1.將拿殊當係二打六：拿殊傷出前頭兩場比賽，出手加埋得12次，平均只得4.5分同4次助攻。拿殊老咗係事實，但係唔係老到跑唔到，點解唔畀佢放手打高節奏戰術同擋拆戰術？如果要打陣地戰，做咩要換拿殊？簽返費沙好過啦！
2.後備兵變晒水軍：頭5場湖人後備加埋只係得17.4分，聯盟包尾！當後備有3分好手Jodie Meeks（米克斯）、拚命三郎佐敦希爾、打老鬼波嘅占美臣，得分可以少成咁？究竟布朗有冇為佢地定下戰術，定係安排佢地做星級啦啦隊就算？
3.公信力不足：開季5場就被炒，我相信湖人高層下決定前都會問下隊中大佬意見，好明顯Kobe只係表面撐，暗地踩，唔想再畀機會佢。
要搵到一個教練「震」得住呢班巨星，又要解放拿殊同一班後備軍嘅攻力（增加擋拆戰術同合理地分配上陣時間），講真真係唔多選擇，前湖人教頭積遜、主打「7秒戰術」嘅迪安東尼、軍紀嚴明嘅史龍、麥美倫，係湖人僅有嘅選擇。
執教湖人係一項唔簡單嘅任務，就算你帶領湖人打到總決賽第7場最後1秒先輸波，都係唔合格，要滿足呢班要求多多嘅支持者，究竟邊個會夠膽上任？
邱益忠