對待運動員唔好咁市儈

中國最近有兩位運動員走進世界體壇,分別係年僅14歲嘅史上最年輕高爾夫球手關天朗,同埋來年有機會進軍一級方程式嘅24歲賽車手馬青驊,佢兩個彈起自然係有真材實料,但又有報道指兩人培訓過程費用高昂,其中馬青驊更被指用錢買F1資格,總之就係錢錢錢!

香港人市儈,樣樣講經濟效益,做乜都追求回報,我哋睇中國體育發展,好多時都將焦點放在培訓一個運動員花費幾多,發展一項體育運動有乜着數,結果就忘記咗金錢以外,體育背後有其崇高嘅精神同意義。

中國兩大天才崛起

有研究指中國每贏取一面奧運金牌,成本大約係6億元人民幣,但係咁樣計數,對金牌選手似乎唔係太尊重,因為除咗劉翔、林丹、孫楊等少數巨星,其餘大部分金牌選手賺錢能力有限,好難叫佢哋填得番6億人仔條數,如果咁計,中國咁多金牌選手,咁咪個個都周身債?

講番關天朗同馬青驊,前者可以話係高球神童,年僅14歲,但球齡已有10年,出年將會進軍美國大師賽同英國公開賽,馬青驊亦係通過重重考驗,來年終可有機會參加F1正式賽事,雖然佢哋使咗唔少錢,但大家要知道,高球同F1競爭好激烈,要求非常嚴格,唔係有錢就可以參加。

高球同賽車門檻高,唔係有錢就得,正如你想入讀哈佛,唔係使錢就收你,早前有報道話有位家長為保送子女入讀哈佛,使咗千幾萬都入唔到,高球同賽車情況亦一樣。