剛過去嘅意甲榜首大戰，祖雲達斯以二比○擊敗拿玻里，但原來拿玻里喺比賽前兩日曾聯絡意大利足總，大鬧祖雲達斯主場出蠱惑。拿玻里話祖雲達斯球場內設有秘密通道，由會員席包廂直接連接到球員更衣室，令到處於停賽期間嘅教練干地，可以靜靜雞行入更衣室向球員教路。
意大利足總收到投訴即派人入球場內進行調查，但最終都係冇發現。比賽期間有錄像顯示，干地一直都留喺包廂內睇波，只見佢不停透個手機與教練團隊溝通。對於拿玻里嘅指控，祖雲達斯高層表示極之不滿，已去信意大利足總提出抗議。
劫匪槍指頭 邦路斯照打走
另外，祖雲達斯後衞邦路斯早前就喺法拉利經銷商門外，畀一個匪徒以手槍指頭，要脅佢除低名貴手錶。點知邦路斯好冷靜，徒手打到劫匪走夾唔抖。及後邦路斯就喺facebook表示，打賊人只係出於本能反應，大家唔好當佢係電影入面嘅英雄人物。