記：你哋點樣開始打羽毛球？
潘：其實我爸爸都係打波嘅，但細個佢唔想我打羽毛球，因為佢知道練得好辛苦，加上我好瘦，點知有次警察會搞親子同樂日，有個Uncle教我打，我就鍾意咗，三年級第一次報訓練班。
雪：我媽每個星期打兩、三次羽毛球，所以我好細個，佢就推埋我去打波，後來跟佢哋打吓、學吓，就開始咗羽毛球生涯。
記：入咗港隊幾耐？
潘：4年
雪：6年
記：講吓對方嘅優點同缺點？
潘：阿雪呀，心直口快，好唔好都講，缺點都係心直口快啦。至於球場內打波好狠，主動，但性急。
雪：阿潘，場外活潑開朗，好多嘢講，最鍾意講爛gag。球場內比較被動、慢熱，但比我冷靜。
記：你哋有冇偶像呀？
潘：林丹。細個唔係好鍾意佢，覺得佢好寸，但上屆亞運決賽之後，開始欣賞佢，嗰場決賽勁好睇，佢亦成熟咗好多，覺得佢好型、好Man囉。
雪：Auntie Wong（王晨）。我細個已經好鍾意佢，問佢攞簽名。我覺得佢打波好型，勁有性格，打波姿勢好優美。我冇諗過後來同佢一隊，記得有一次全英賽同佢一間房，超緊張，又怕嘈醒佢。佢其實好錫我哋，成日煲紅棗水畀我哋飲。
記：如果你哋唔打羽毛球，想做乜嘢？
潘：讀吓書囉！我想做海豚訓練員，我好鍾意海豚，但游水唔叻，唔知得唔得呢？
雪：做少奶，哈哈！我都想做狗仔訓練員，我好鍾意狗，屋企養咗兩隻松鼠狗，勁可愛。
記：記者
潘：潘樂恩
雪：謝影雪