凹凸拍檔竊竊私羽
一個鍾意煲韓劇、一個愛睇Ironman，一個閒時唔like着裙、一個喜愛穿裙行街，兩位「90後」羽壇雙姝潘樂恩及謝影雪，因為羽毛球走在一起更成為了拍檔，她們除了這輕輕小球之外，生活上好似冇乜共同話題，但二人贏完世青銅牌，又「拍住上」去打倫敦奧運，最近更揚威日本創歷史。「默契」究竟從哪處來？「一凹一凸」互補長短，正是她們二人衝出世界的「必殺技」！
香港羽壇近年新星湧現，土生土長的潘樂恩（阿潘）與謝影雪（阿雪）最近在日本超級賽揚威，為香港羽壇寫下歷史新一頁。其實，她們合作時間很短，正式拍檔只是短短兩年。09年教練臨場「柯打」出戰亞青，冇夾過就上陣殺入8強，隨即再戰世青賽，就憑亞青賽的幾場經驗作熱身，竟然踏上世青頒獎台，看來早已為她們今日的成績鋪下伏線。
即使她們同住體院，但並不是同房室友，練波後各有自己節目，場外共同嗜好完全不同，令人更有興趣探索她們雙打「默契」何來。
「我鍾意睇戲，但佢唔鍾意，淨係煲劇，特別係情情塔塔，但浪漫片唔啱我，唔好以為我好斯文，其實我好鍾意睇《Ironman》、《Avengers》（復仇者聯盟）嗰類電影，我成日話佢竟然唔知乜嘢係Ironman。」
留着一把長長秀髮的阿雪坦言自己外表完全可以欺騙人，內裏性格絕對是男仔頭。
細問她們如何加強「默契」？阿潘、阿雪眼望眼始終都是「答唔出」，她們說在球場比賽時都會多傾講，但球場外就很少溝通，她們更試過因為發揮不佳而「扯火」。阿雪直言：「我性格比較急躁，曾經試過打得好差發脾氣，佢打得唔好，即係我都打得唔好，惟有自己發脾氣，不過，後來都知道要沉住氣，雙打嘅最大考驗就係點樣頂住。」
在旁不停笑的阿潘補充：「我哋有試過冷戰，比完賽大家唔睬。」哪最長一次冷戰期幾耐？阿雪想了想說：「比賽輸了都係在同一房間，兩個人唔講嘢會口臭，真係唔記得，頂多一兩天，邊個啖氣快落就主動出聲先囉。」
不過，這個情況自日本超級賽前已很少發生，阿潘認為大家多比賽多體驗，溝通上就會有改進。
經過時間的磨合，急躁的阿雪及慢熱的阿潘已經在場上找到互補的效果，她們「一左一右」的握手更成為其中一個優勢，阿潘說：「我本身比較慢熱，以前打波細細力，依家受到阿雪影響，打波狠咗好多，以前唔敢主動，依家遇到機會就會發力攻過去。」在旁的阿雪都承認大家的確對彼此都有良性影響：「佢影響我好多，場內場外我都係一個好急嘅人，但佢會不時提我冷靜啲，打失波再黎過，其實我依家仲係好衝動，希望可再改善。」
其實，阿雪與阿潘這對羽壇雙妹的默契，已不自覺地培養出來，正如訪問當天，兩位少女在傳媒要求下穿上便服影「靚相」，想不到二人「冇夾過」的情況下都以休閒服、短褲兼「踢拖」亮相，相當合襯。
要講她們比賽場外最有「默契」的，應該要數「整蠱黑妹」，提起這方面兩位美少女立即大笑起來，不斷重提過往如何整蠱師姐葉姵延的點滴。
「唔知邊個放個大紙皮箱喺宿舍，我哋整咗個洞，然後叫黑妹行去走廊，跟住跳出嚟嚇佢，嚇到佢跌落地，哈哈！」
阿雪講到手舞足蹈：「有一次阿潘喺黑妹部電腦，整咗貞子做wallpaper。」阿潘即搶着說：「間房又黑麻麻，嚇到佢（黑妹）大叫。」二人講起「整蠱黑妹」一唱一和，完全盡現雙打的「默契」。
原來，「默契」就是這麼簡單！
揚威東瀛 展望亞運
謝影雪與潘樂恩這對羽壇雙姝，坦言在日本超級賽捧盃是比預期早，她們未來將出戰歐洲一連串的賽事，期望可以爭入年終總決賽資格，而她們更期望可在來屆亞運會上爭取獎牌。
入隊四年的阿潘稱：「我真係冇諗過會攞冠軍，想當然是有，但無想過真係可以做到，對我哋日後比賽嘅信心大增。」對於未來目標，「潘謝配」揚言想在世界賽、亞運會等大賽打出成績，阿雪稱：「未來幾站超級賽，我哋都想攞，但目標會放在2014年嘅亞運會，希望可以攞到獎牌，而世界賽如果能打入8強已經好滿足。」
謝影雪
年齡︰20歲
身高/體重︰1米65/63公斤
握拍︰左手
世界排名（女雙）︰11
輝煌戰績︰09東亞運團體銅牌、09世青女雙銅牌、10德國公開賽混雙冠軍（拍魏仁君）、12日本超級賽女雙冠軍
潘樂恩
年齡︰21歲
身高/體重︰1米69/61公斤
握拍：右手
世界排名（女雙）：11
輝煌戰績︰09東亞運團體銅牌、09世青女雙銅牌、12日本超級賽女雙冠軍
圖、文：李芷韻、Kin