自從嫁咗畀威廉王子、做埋王妃之後，凱瑟琳嘅人氣真係勁到無朋友！依家英國搞奧運，又點少得佢呢？呢位靚爆鏡嘅劍橋公爵夫人，一有時間就走去睇奧運，而成班英國運動員都好Like佢！點解？咪就係因為佢已經變咗腳頭好嘅「吉祥物」，積累「金牌」數目更係皇室之冠，「金牌王妃」呢個名真係啱晒佢！
依家美國喺奧運金牌榜領先緊，但原來英國皇室都有個金牌榜，睇番班皇親國戚觀戰時，英國攞到幾多面獎牌，究竟係「吉祥物」定「黑腳」，咁就一目了然！截至昨日為止，「皇室獎牌榜」首位係5金2銀3銅嘅凱瑟琳；排第二嘅就係佢老公威廉王子，有4金1銀2銅成績；而哈利王子就只得2金2銀3銅。凱瑟琳之前就畀人話係「旺夫」，經過今次奧運佢夾埋只係睇咗18場比賽就有咁嘅成績，隨時又會畀班「英國宅男」封為「旺國女神」！
講番凱瑟琳嗰獎牌之旅，最具代表性可以話係去睇馬術賽，皆因另一位皇室成員安妮公主個女扎拉，就喺佢哋支持下攞到銀牌；而梅萊擊敗費達拿奪得網球男單金牌、單車隊以破世界紀錄時間獲爭先賽男團冠軍，呢啲都係凱瑟琳今屆奧運「戰績」。