林丹膺「被抽水」之王

「林丹」飼料、「葉詩文」泳衣、「劉翔」足球鞋……倫敦奧運舉行得如火如荼之際,中國奧運代表團的運動員,特別係嗰啲喺今屆一躍而紅嘅新星,就成為商家嘅「寵兒」,爭相用佢哋嘅名字註冊喺唔同商品之上,擺明想「抽水」上位。而喺呢場爭奪戰中,「超級丹」林丹就暫獲冠軍,成為「被抽水」之王。

只要登上中國商標網,輸入「林丹」兩個字,會發現一共有54條記綠,主要有服裝、鞋帽、運動器材等「相關」產品,就連風馬牛不相及嘅狗糧、動物飲料都有,值得一提嘅係,其中45項紀錄係同一個申請人持有。另外,「葉詩文」三個字亦成為成都一家企業嘅註冊商標「熱門」選擇,其產品範圍包括泳帽、泳褲及泳衣等。

早前蘋果公司以6,000萬美元與內地一間企業就Ipad商標問題達成和解協議,令世人再次見證商標背後的巨額利潤,加上喺內地註冊一個商標只需數千元人仔,這與6,000萬美元相比真係微不足道,難怪令部分人熱衷搶先註冊名人商標,希望從中「抽水」獲利。

濫發商標難賣出

不過,搶先註冊名人商標亦帶來問題,就係時下國內雖然註冊了很多商標,但超過9成嘅商標都係冇用過。出現呢個情況嘅主要原因係,有啲人搶先註冊後,卻面臨無得賣嘅局面。