美女門神「願望」實現 蘇露好嘢!

【本報綜合報道】美國能夠成為奧運3連霸,梅開二度嘅萊德當然係頭號功臣,不過美國傳媒一致認為係靚女門神蘇露(Hope Solo)令佢哋願望(Hope)成真。如果唔係佢喺比賽末段救出岩淵真奈嘅單刀波,去年世界盃決賽被日本後來追上捧盃嘅噩夢隨時重演。

去年世界盃決賽美國於兩度領先情況下,都被日本於法定時間完場前及加時末段入波追成平手,最終美國更射輸12碼飲恨。

完場前撲出日本單刀

日本今仗落後下一樣展開狂攻,蘇露全場起碼作出4次撲救,當中最關鍵係完場前7分鐘,日本後備岩淵真奈偷甩美國隊長拉姆邦尼腳下球,然後單刀射門被蘇露橫身撲出,前鋒雲芭芝賽後承認呢一撲係贏取金牌嘅最大關鍵:「去年嘅世盃我哋未能保住領先優勢,結果痛失冠軍,我哋今次抱住唔可以再犯錯嘅心態比賽,所以係蘇露幫我哋贏得金牌。」