奧運賽場除咗用嚟比賽之外，原來都可以係求婚場所！日前於沙排場地上演感人一幕，一位英國銷售經理，帶埋女朋友去睇沙排賽事，於賽事主持人穿針引線下，男方於賽場中心突然跪地求婚，令在場過千名觀眾拍爛手掌。
呢名銷售經理同來自斯洛伐克嘅女友都係業餘沙排運動員，前者去到賽場，偷偷同主持人溝通，後者亦好願意成就呢件美事。當西班牙對意大利嘅賽事完結後，主持人突然邀請二人到場中心，銷售經理隨即跪地向女友遞上戒指，後者當場感動到喊，不斷點頭應承，在場觀眾都為佢哋鼓掌，送上祝福。