今次倫奧入場觀眾之少令主辦單位大失預算，但鼠竊狗偷數目卻遠超預期，全球「小偷精英」目前正匯聚當地，日日喺街搵「水魚」。當地警方透露，有「偷神」日搵2萬鎊（約24.2萬港元），呢勻真係發達。
奧運全球矚目，萬千體育迷近月湧入倫敦，個市場咁大，「文雀界」梗係唔會放過呢個搵食機會，唔少東歐同南美嘅龐大偷竊集團，早已抵達當地，專劏海外遊客，其中周時身懷巨款嘅中國人，更被佢哋視為「水魚中嘅水魚」。當地警方表示，於奧運期間每分鐘都有人被搶劫，每日平均有1,700人遭殃；普通一個小偷日均收入約1,000鎊，而技術高超嘅，就日搵超過20萬港元，都咪話唔誇張！