因為英國倫敦夏季氣溫驟降，令到唔少女子選手都變得密實，個個都着番件長袖衫！今屆沙排賽程較為頻密，比賽好多時都要喺晚間進行，於當地時間星期六，最後一場由美國對澳洲嘅女子賽事，要去到晚上11點先開波，當時場內氣溫已降至攝氏十七度，所以兩國選手都唔能夠齋着泳衣比賽。
美國選手着番件長袖衫抵冷，而澳洲選手更加怕凍着埋條長褲比賽。比堅尼泳衣向來都係女子沙排嘅標準服裝，因為緊身裝束可防止沙粒擦傷皮膚，不過基於倫敦日夜溫差大，故國際排聯批准球員穿着保暖衣物作賽。