劉翔媽領軍開餐「包餃」掂

【本報綜合報道】奧運唔單止係運動員嘅賽場,原來佢哋嘅屋企人亦相當忙碌,其中來到倫敦嘅劉翔媽咪吉粉花,就率領一眾運動員家屬,以及前奧運名將一齊包餃子、睇開幕式,非常熱鬧。

呢班「包餃子團隊」中,不但有劉翔父母,仲有林丹媽咪同老婆謝杏芳、陳一冰家姐、何雯娜雙親、舉重選手李雪英嘅爹娘,另外一些前奧運選手如楊威、楊雲、錢虹等亦加入「戰團」。

李娜手藝差過跳水

作為「包餃子團隊」揸弗人,無論係切菜定調味,都由劉翔媽咪吉粉花一手包辦,果然係廚藝高手。不過,前跳水奧運冠軍李娜就學藝不精,佢包嘅餃子好似跳水時嘅水花咁大小不一,佢解釋「這是爸爸、媽媽和孩子」,引起哄堂大笑。最後,大家食完餃子,開開心心睇開幕式。