前NBA入樽王打「超級賽」

甲一聯賽受早前颱風影響,延至今晚才補賽打第三回合,但球迷反應熱烈,所有門票全部售罄,至於今晚冇飛但又有興趣睇好波的fans可不要失望,事關由聯賽前四名球隊配合外援參戰的「超級邀請賽」,已定於8月7日上演,一樣好波連場。

福建邀費迪鍾斯

將第三年舉行的「超級賽」將由永倫、南華(上屆冠軍)、福建及飛鷹角逐,8月7日至9日進行單循環比併,8月11日決賽,全部賽事在修頓室內場進行。各隊可分別邀請兩名外援助拳,首屆賽事冠軍福建為重奪錦標,積極與前NBA球員接洽,顯示雄心壯志。

福建領隊黃偉鴻表示,已與04年NBA明星賽「入樽王」費迪鍾斯簽訂合作協議,02年選秀被溜馬以第14籤揀中的他,先後効力過速龍、拓荒者、紐約人及快艇等,近年亦去過中國搵食。司識得分後衞的費迪鍾斯身高1米88,NBA最高單場得分紀錄31分。至於另一位外援可能是上屆MVP科華斯。