跳水項目不嬲都擁躉眾多，無論男女、單雙人、彈板抑或高台都咁受歡迎。其實跳水早於1904已列入奧運項目，歷史相當悠久。其實有睇開跳水都知，動作質素好與壞都離唔開幾個大原則，譬如騰空高度、動作連貫性、入水時水花多少等。而中國運動員勝在柔韌性及穩定性兼備，尤其壓水花方面更特別有心得，故能長時間在國際大賽同奧運會取得壟斷性的優勢。
有時聽跳水評述員會以一連串數字及英文字母去交代運動員所做的動作，其實這是動作組合的簡稱。為免每次都要用冗長文字去陳述整套動作，國際泳聯就為各組動作制訂編號。當中包含動運員起跳前的方向、起跳後動作及空中姿勢等，聽似複雜，但如果能學懂「解碼」，欣賞跳水時，自能大大提升趣味。
至於近年新增的雙人跳水，與單人項目最大分別是加插了同步評分。因此就算所選動作難度系數不高，雙人組合亦可靠高度同步性去彌補不足，亦令這項古典運動的可觀性進一步提升。