西班牙到埗即刻救番生

倫奧足球冇星味銷情慘淡,要靠狂牛兵團打救!今屆足球門票滯銷,組委會之前已經蠱惑招盡出,可惜就連縮減座位同派飛都一樣搞唔掂。好彩隨住擁有3名歐國盃冠軍成員嘅西班牙男足抵達蘇格蘭後,終於掀起一輪撲飛熱,周四晚嘅西日大戰勢必爆滿,算係幫奧足攞番個彩!

奧足門票大失收,組委會日前喺除溫布萊以外嘅球場進行「小工程」縮減座位,令整屆賽事門票數量大幅減少50萬張,務求將個售票率變得好睇多少。事實上,單係喺蘇格蘭咸頓公園球場舉行嘅8場男女足賽事,組委會一直都唔敢有期望,上星期有關方面仲宣布,5萬張送畀學校嘅波飛,會加碼送埋畀各間體育會、慈善團體同青年計劃嘅成員,簡單嚟講就係避免比賽時觀眾席出現得小貓三、四隻嘅尷尬場面。

首戰日本逼爆格拉斯哥

不過,隨住日前西班牙同日本男足先後抵達格拉斯哥,情況終於有所改善,事關擁有包括桑馬達、佐迪艾巴同查維馬天尼斯嘅狂牛兵團,人氣勁爆,唔少球迷都慕名嚟欣賞呢支奪標熱門硬撼亞洲「一哥」嘅比賽。

賽事場地媒體經理安迪米切爾表示:「咸頓公園好難得會舉行呢種獨一無二嘅頂級比賽,好多家庭都有意嚟睇西班牙呢場波。由於睇西日大戰會兼送洪都拉斯對摩洛哥嘅波飛,我哋預計今場波將可能爆滿,同時女足美國對法國之戰都賣咗3萬張飛o架。」

另外,西班牙奧足證實會拉隊出席周五嘅奧運開幕式,據聞領隊路爾斯米拿本來怕班球員攰,唔贊成飛去倫敦湊熱鬧,事關大軍周四仲喺格拉斯哥同日本比賽,周五就要轉飛紐卡斯爾準備周六對洪都拉斯,只係班球員個個都想參與開幕式,所以決定喺專機航程上,加插倫敦一站。