【本報綜合報道】前車路士少帥保亞斯即將加盟熱刺，仲會帶埋昔日波圖愛將摩天奴一齊來投，呢位葡萄牙國腳率先爆料，話就快再同保亞斯合作。不過波圖趁機開天索價，要求2,500萬鎊轉會費（約3億港元），成為兩人重聚嘅最大障礙。
25歲嘅摩天奴曾經喺保亞斯麾下為波圖奪得歐霸盃冠軍，亦係今屆歐國盃葡萄牙嘅主力，佢接受傳媒訪問時忍唔住爆響口話，即將再同保亞斯拍住上，一定會取得成功。除咗摩天奴，熱刺亦有望擊敗利物浦，用800萬鎊（約9700萬港元）簽下史雲斯中場基菲爾施古臣。