占士值得攞總冠軍!

無論你鍾唔鍾意勒邦占士都好,今次佢攞到總冠軍,你都要心服口服,5場總決賽中佢終於明白到自己嘅優勢就係乜都唔理衝入籃底,用龐大身軀征服對手,而唔係到關鍵時候手軟腳軟,亂射根本唔準嘅3分球。雷霆最大敗筆係冇人防守到占士,而杜蘭特反而被占士同柏堤亞輪流防守下,威脅性大大降低。

舊年失敗嘅熱火,一年後捲土重來,睇得出佢哋記得舊年驕兵必敗嘅教訓,每場都好踏實咁去爭勝。即使落後十幾分,熱火冇輕易放棄比賽,一球一球咁追返嚟;贏住十幾分佢哋繼續保持專注,直到比賽結束,呢樣至係一支冠軍隊應有嘅風範。

至於雷霆球迷唔使失望,冇試過失敗,又點會成功?佐敦頭7年被活塞同塞爾特人拒諸總決賽門外、高比拜仁頭3個冠軍都被奚落「冇奧尼爾冇冠軍」,杜蘭特唔使喊,因為未來係屬於你哋。雷霆5年內由一支魚腩部隊,透過精明選秀,變為一支令人聞風喪膽嘅新勢力。由前年西岸首圈到舊年西岸決賽,再到今年總決賽,我相信雷霆下季有力再度向總冠軍發動衝擊。

邱益忠