占士又做懦夫

一直被彈「冇吉士」的勒邦占士昨日於東岸決賽又逃避最後一擊,連累熱火加時以91比93慘負塞爾特人,「第3節定律」失效兼且被「綠軍」總場數追到2比2。輸波罪人占士賽後繼續搵藉口卸膊,結果惹來全城炮轟係「懦夫」!熱火明早就算有保殊復出都難敵士氣如虹的塞爾特人。(now 635台周三早上8時30分直播)

昨於第4節末段當賽至89平手時,大鐘剩餘7秒熱火展開最後一擊,但這時「大帝」占士卻突然傳波給夏士林,後者射失令比賽進入加時。熱火於加時階段僅得2分進帳,加上「大帝」於尾段取得加盟熱火後首次6犯離場,連累球隊以兩分之差不敵塞爾特人。

雖然全場攻入29分的占士超越高比拜仁,以27歲零156日之齡成為聯盟史上最年輕的季後賽「3,000分先生」,不過「大帝」再於關鍵時刻隱形就令紀錄之夜成為里程「悲」,美國記者亦透過twitter炮轟「大帝」,然而占士賽後則拒絕認衰:「我聽到朗度叫加納特夾擊我,嗰時真係冇位出手,希望下次執行戰術會做得好啲!」

保殊Game5復出救亡

翻查數據,熱火對上14場季後賽在第3節得分壓過對手都能獲勝,無奈昨仗第3節大勝對手21比12依然難挽敗局,「第3節定律」終告失效。因拉傷腹部缺陣多時的保殊,賽後親口承認已全面復操,極可能於明早復出救亡,不過對撼加納特定必冇啖好食,該名「綠軍」老將於4場東岸決賽場均貢獻20.5分及10.7個籃板,狀態甚弗,「綠軍」受讓7.5分捧下盤。

另外,聯盟公布總決賽日程,首戰將於香港時間6月13日早上9時Tip Off。

本報綜合報道