刨完變態小說零舍勁大帝殺敵冇溜手

【本報綜合報道】風靡全球的《飢餓遊戲》題材變態，講述一班後生仔女化身殺人機器，互相殘殺爭逐最後勝利。雖然NBA季後賽未有「殺人」情節，不過「大帝」勒邦占士賽前就刨《飢餓遊戲》小說儲火，卒之打出遊機戲般的夢幻數據，率領熱火勇挫溜馬，扳成場數2比2平手。

占士昨日貢獻40分、18個籃板及9次助攻的超級數據，加上提前兩個半鐘練波、日前找大學教練傾偈的韋迪亦有30分進帳，助熱火作客101比93砌低溜馬。賽後一眾NBA球星都透過twitter表示「服咗」占士，當中鷹隊中鋒荷福特就稱：「占士係真正嘅MVP，就算我哋打機想攞到呢個數據都有難度！」

熱火雙巨頭占士及韋迪昨仗轉攻內線搵到食，禁區得分足足贏溜馬18分，明早回師主場有望再下一城，讓7.5分捧上盤。另一邊廂馬刺作客102比99打沉快艇後錄得18連勝，總比數贏4比0殺入西岸決賽，成為聯盟史上第4支頭兩圈季後賽都能夠零封對手晉級的雄師。

不過，之前三隊包括05年熱火、09年騎士及10年魔術都於之後一圈止步，且看馬刺能否打破魔咒，拿下西岸冠軍？

溜馬 93:101 熱火

快艇 99:102 馬刺

時間　主隊Vs客隊　讓分　推介

周二7:00am 塞爾特人Vs76人塞讓5.5分塞爾特人

now 678直播

周二9:30am 雷霆Vs湖人雷讓8.5分雷霆

周三8:00am 熱火Vs溜馬熱讓7.5分熱火

刨完變態小說零舍勁 大帝殺敵冇溜手