當鷹隊大祖（祖莊遜）因傷缺陣時，細祖（祖斯史密夫）早前獨取30分同12球籃板幫球隊打低西岸一哥雷霆。
26歲嘅細祖最令我欣賞係佢場均近兩個嘅變態封波能力，加上優異嘅籃板（9.5個）同穩定得分（17.5分），絕對係奪冠級球隊嘅一塊拼圖。當然佢唔係無缺點，防守上基本上係打體能波，太鍾意射唔擅長嘅三分波（命中率約三成），而且罰球命中率偏低。
喺轉會窗關閉前，我支持細祖轉會，最主要原因係鷹隊只屬二線球隊，要殺入總決賽真係要需要時機同運氣，加上係人都知佢好想打明星賽，只可惜大祖同基本功紮實嘅荷福特喺度，佢一日唔走，一日都只係小三。
其實塞爾特人同鷹隊可以考慮將加納特（KG）同細祖互換。雖然細祖防守唔夠KG咁有經驗，但考慮到過去四季KG缺陣咗77場比賽，如果塞隊換到細祖同朗度拍檔，可以減少重組時間，而鷹隊會得到一個擁有冠軍指環嘅老將。
去到鷹隊，KG最主要的任務係教識大祖做一個真正領袖，同將畢生所學傳授畀荷福特，等鷹隊可以具潛力在東區稱霸。呢個係一個雙贏局面，只可惜交易未有出現，令人覺得相當可惜。
邱益忠