去年底香港世界排名係歷史谷底嘅169位，令香港足球蒙羞，其實以港足嘅水準，排名有乜理由仲低過蒙古、菲律賓先得o架！呢嗱，３月份世界排名港足已經連升11級去到158位，排名上升，正好為「鳳凰計劃」營造有利氣氛。
以波論波，港足水平其實最少可以排喺130至140之間，即係話只要正正常常約吓友賽，踢多幾場波搶分，咪理啲是非，港隊應該仲可以升多廿幾卅格o架！有人話世界排名唔代表啲乜，最重要係踢得好，呢方面無謂爭論，世界排名嘅計分方法同遊戲規則都係咁，你只有接受，新任教練摩力克就選擇玩呢個遊戲，仲話要將港足排名打入前100位添！
有網民開Topic討論，嚟緊港隊應該約啲乜嘢對手，當中好多都甚有見地，值得摩帥參考。例如６月份，港隊最佳友賽對象相信就係印尼，有消息話印尼聯賽分裂，成班國腳主力唔踢得國際賽，現時嘅印尼隊係拉雜成軍，最近喺世盃外圍賽對巴林就狂吞10蛋，印尼現時排147位，若然港隊贏到印尼，肯定加分不少。
其實歐洲嗰邊仲有大量排名高嘅魚腩，例如法羅群島排116位，或者係好多球迷成日讀錯嘅列支敦士登就排緊137，呢啲球隊係由業餘球員組成，港隊只要認真備戰，贏佢哋唔係冇可能o架！
波男