高比仔戴新罩冇晒feel
【本報綜合報道】高比仔換罩換出禍！近期戴咗「鬼面罩」之後着晒火嘅高比拜仁，尋日突然由透明罩換上黑色罩，搞到佢成個青蜂俠咁。可惜高比仔得個型字，新面罩搞到呢位湖人球星好唔舒服，最弊係累佢冇埋手感，尋日作客活塞26射僅中8球，結果湖人在加時後以85比88輸波。
為了讓高比仔戴得更舒適，湖人專登造了一個黑色新面罩畀佢，殊不知竟然好心做壞事，高比仔開賽後不時撥動新罩，好明顯唔多習慣，結果首節6射僅1中，嚴重影響發揮。
生死關頭3射全炒
高比仔終在第2節中段換番之前所戴嘅透明罩，可惜始終搵唔番前三場着火手感，雖然佢一度為球隊追成平手打入加時比賽，但在加時一節竟然3射全炒，最終成為輸波罪人。「小飛俠」今場表現低迷，26射中8球得22分，僅得3成命中率。湖人今季作客戰績慘不忍睹，輸埋今場之後作客戰績6勝13負，以一支爭標分子嚟講，真係十分肉酸。
