J.Lin瘋再起時

（廣東體育頻道周四早上9時30分直播）

隨着巴朗戴維斯傷愈復出，林書豪近期嘅上陣時間已有所減少，數據亦大不如前，若然再次出現上場對塞爾特人失準嘅情況，唔排除會失去正選位置。為了改善弊病，J.Lin坦言已努力適應新角色，希望成為一個穩定性高嘅控衞：「我現時正在嘗試新角色，意味會更少起手，因為我希望成為一個更全面嘅控衞，其實作為一個PG，真係唔想起手太多。」

關鍵時刻用巴朗孭飛

至於教練迪安東尼就話：「若然你係進攻重心，起手其實好易，但如果你有其他選擇，就要學識融入其中，林書豪必須要成為一個稱職控衞，令其他隊友發揮得更好，但同時自己亦唔可以太差。」此外迪安東尼亦承認，林書豪現時仍處於學習階段，所以關鍵時刻好可能會交番畀經驗老將巴朗戴維斯落場。

暑假返台再開訓練營

不過，林書豪前景依然一片光明，事關「林瘋」熱潮已令佢成為球隊金蛋，紐約人宣布下季加票價，平均加幅為4.9%。同時林書豪亦宣布，嚟緊暑假會繼去年一樣再回台灣開訓練營，今次返台肯定哄動。

本報綜合報道