深水埗場今演4強大戰 遵理兄弟內訌冇面畀
「全港學界精英足球比賽」轉眼打到4強，兩場準決賽今日會在深水埗運動場上演。頭場下午3時正遵理學校（荃灣）與遵理學校交鋒，至4時半有衞冕球隊仁濟醫院董之英紀念中學，接受英皇佐治五世學校挑戰。我梁穎瑜（Eleana）當然都會繼續以now Sports主持身份，到場為大家直擊啦！
KGV挑戰董之英
先講頭場，擁有多名甲組腳在陣的荃遵，上場與勁敵喇沙書院踢到12碼階段才分出勝負。戰情激烈亦令本身並非狂熱足球迷的我睇得非常緊張。今場荃遵與遵理對撼，由於兩隊實力相當，我相信必有一場惡鬥，但比數未必會大。
尾場上陣的KGV英皇佐治五世，隊中有不少欖球員，身形高大，高空波有優勢。不過，上屆冠軍董之英擅打地面組織，我預料兩隊硬碰必有火花。以我觀戰多日所得，何者先入波就比較「着數」。想知哪兩支勁旅能夠殺入旺角場打決賽，就要密切留意深水埗場的賽果。再提提大家這場決賽會作電視現場直播，到時我會陪大家一齊睇波。
賽事資料
日期：2012年3月1日 地點：深水埗運動場
下午3時正 遵理學校(荃灣) Vs 遵理學校
下午4時半 英皇佐治五世學校 Vs 仁濟醫院董之英紀念中學
花名：大姐瑜
身高：1米73
擔任now Sports主持年資：約4年
主要主持項目：田徑、網球
體壇威水史
前香港田徑代表、前女子400米學界紀錄保持者
欣賞足球明星：卡斯拿斯