【本報綜合報道】NBA有不少傳奇人物，林書豪未紅時要在隊友家中梳化過夜，達拉斯小牛嘅後衞韋斯（Delonte West）就窮到燶連梳化都冇得瞓，要於小牛更衣室過夜！停擺期間喺傢俬舖打過工，又試過冇錢帶囝囝睇醫生嘅韋斯，決定「拋個身出嚟」，繼與勒邦占士阿媽傳過緋聞後，日前再被踢爆玩忘年戀搭上富婆，誓要脫貧！
小牛奀星韋斯縱然職業生涯賺取超過1,400萬美元波糧，但卻因與前妻打官司及投資失敗散盡家財。早於今季停擺期間，韋斯就透過Twitter求救，希望有心人能借錢給他帶愛兒睇醫生，繼而又上載自己到傢俬舖打工的相片，並變賣汽車及球衣，可謂窮途末路。
韋斯昨日向《達拉斯新聞網》爆料：「因為我有犯罪紀錄（09年違例藏械及違例駕駛被捕），所以冇業主肯租樓畀我，小牛作客打波都話有酒店瞓，但主場賽事我就無家可歸，焗住要喺更衣室過夜。」消息一出，小牛班主古班已立即吩咐朋友安置韋斯，令後者有個安樂窩。
住屋問題得到解決，韋斯下一步就要「搵油水」。小牛昨日主場以92比93不敵籃網，賽後韋斯受訪時雖否認曾搭上「大帝」勒邦占士母親哥莉亞，但美媒《Terezowens》就指韋斯近日於夜店與一位富婆「撻着」。
「大帝媽」與韋斯的一段情疑幻疑真，阿仔勒邦占士拒為事件作評論，專心打波爭冠軍指環最實際。「大帝」於明星賽孭鑊累輸波，明早定必找拓荒者發洩，隨時炒鋪勁。（廣東體育頻道周五早上11時30分直播）