林書豪嘅神奇故事可以延續幾耐？fans們當然希望愈長愈好，但林書豪自走紅以來，一直保持低調，可見佢係一位心理質素極佳嘅球員，仲知道體育運動好現實，贏波唔會囂，輸波亦冇頭耷耷。
早前紐約人嘅七連勝其實只因賽程容易應付，後來當遇上具實力球隊例如熱火，佢哋打醒十二分精神盯實林書豪，便可順利贏波。
來到新秀賽，林書豪上陣不足十分鐘，取得兩分，粉絲們亦要體諒，林書豪只是血肉之軀，面對近期頻密賽程實在難頂，大家畀啲時間佢，唔好見高拜見低踩。
紐約人積弱多時，林書豪可以做嘅，已經做晒，雖然大家期望佢可以成為基斯保羅同迪朗威廉士等頂級控衞，但都係將來嘅事，現時林書豪只係一位出色嘅球星，要成為超級巨星，仲需要時間證明。
話題轉番去英超足球，西倫敦車路士與北倫敦阿仙奴近期陷入困局，今季面臨四大皆空，而且都幾長手尾，谷底反彈唔係咁易。阿仙奴已經六年冇冠軍，今季食即食麵簽入阿迪達，季中借用亨利，但逃唔過二月魔咒；車路士仲麻煩，保亞斯舞唔掂車仔三寶泰利林柏特A高，搞到永無寧日。
黃興桂