一瞓發威!想買菲爾斯幸運梳化

短短四日前,林書豪嘅NBA前景仍然「危殆」,有傳紐約人希望引入從CBA回流嘅JR史密夫,裁去加盟後只在「垃圾時間」上陣嘅林書豪,難怪Jeremy早前指加盟紐約人後一直居無定所,甚至要去隊友菲爾斯屋企借宿瞓梳化。不過大爆發之後,Jeremy坦言最想向菲爾斯買下那張「幸運梳化」!

64年來最威NBA哈佛仔

林書豪早前向記者透露,因為對籃網賽前一晚冇碇瞓,要到隊友菲爾斯屋企借宿,記者在今場賽後再問Jeremy使唔使瞓梳化時,佢就話冇啦,但佢覺得菲爾斯張梳化好似擁有神奇力量咁,所以好想向佢收購,第時可以瞓一瞓吸收靈氣。

其實林書豪同菲爾斯咁老友,多少因為兩人都係「高材生」啱嘴形!林書豪來自哈佛大學,菲爾斯就來自史丹福大學,論學歷兩人在NBA可謂數一數二,而早前Jeremy取得20+得分亦成功為哈佛爭光,事關對上一次有「哈佛仔」在NBA取得20+,已要數到64年前効力塞爾特人嘅Saul Mariaschin。