曾幾何時，拓荒者中鋒奧登被形容為下一個奧尼爾，可惜因為傷患問題，過去四季出席率只係可憐嘅1/4（有兩季完全冇出過場）。不過，拓荒者為免肥水流入別人田，決定賭多一鋪，季前提供一份一年890萬美元嘅合約畀佢，多少因為奧登每40分鐘就可以交出17分、13.2球籃板同2.5個「火鍋」，絕對有力成為全聯盟最恐怖中鋒，只可惜我哋嘅奧登叔叔，無奈又再因傷賽季報銷！
其後奧登自願減薪至150萬美元（約1,200萬港元）。1,200萬港元係乜嘢概念？喺香港，如果你月入5萬，未必買到豪宅，但至少可以吸引唔少囡囡，但你要搵到1,200萬港元，至少要做夠20年，重要一蚊都唔使。奧登叔叔只要着住西裝坐足後備席一年，就印印腳袋足1,200萬，我唔係高登仔，都好想講一句「So Sad」同「很想要吧」！
將奧登同香港打工仔比較係冇咩可比性，所以筆者根據ESPN資料做咗個小統計。原來NBA有至少151個球員人工低過奧登，包括年薪98萬美元嘅勇士「入樽王」尼特羅賓遜，同埋小牛正選後衞、年薪114萬美元嘅韋斯。上述兩個球員雖然唔係咩大角色，但至少能夠為球隊作出貢獻吖，唔似得奧登上極都上唔到場先。如果，萊爾冇因傷提早退休，奧登冇做「紙板人」，或者今日嘅拓荒者，已經建立一個王朝了。惟有感嘆一句，「拓荒者，這些機會（擁有偉大中鋒）不是屬於你的」。
台灣《美國職籃》專欄作家邱益忠，自初中起不自禁地戀上NBA，對每支球隊有着獨特見解，以風趣幽默形式同你論盡NBA！