洛城打吡 技規橫飛 湖人火爆拆艇
昨日上演嘅「洛城打吡」充滿火藥味，球證吹了多達6次技術犯規，「世界和平」阿堤斯與格芬衝突，而加素之後又同基斯保羅埋牙，最終湖人復仇成功險勝96比91。
畀加素拍頭 ＣＰ３發晒茅
湖人約在十日前先輸過畀快艇，所以今場打得特別有火，加素首節已領取首個技犯，去到第三節兩軍爆發衝突，當時格芬護球倒地，「世界和平」搶波時坐落格芬身上，隨即引發雙方球員上前推撞。
賽事尾聲時湖人高佬加素上前拍一拍矮仔ＣＰ３個頭，殊不知躁爆ＣＰ３立即掃開佢隻手，之後仲分別同加素及高比仔展開舌戰。湖人今場復仇成功，主要因為加素打出水準，個人攻入「雙雙」23分及10個籃板，而高比仔就交出24分、7個籃板及6次助攻，表現全面。復出即輸波嘅ＣＰ３賽後透露，同加素嘈交主要因為佢最憎人拍佢個頭，仲警告加素以後唔好再掂佢！