港甲球證今季又嚟料，上半季多場賽事引發唔少風波，甲組會同球迷怨聲不絕，有較具資歷嘅球員同波男講，佢話依家啲球證，先唔講執法水平如何，淨係講ＥＱ已經唔掂，因為佢哋好容易就吹罰，郁吓就畀牌，相比起嚟，上一輩嘅球證對於處理犯規就嚴謹好多，至少唔會判到亂晒龍。
該位具資歷球員係邊個，波男唔方便公開，事關人哋仲要喺球圈搵食，佢嘅言論若然激嬲某啲人，日後喺球場上會否遭受「特別待遇」就冇人敢保證嘞！
資深球員又指出，以前嘅比賽邊會有咁多紅黃牌，每當場波出現好多罰牌，必然係場面火爆甚至有暴力事件，但近幾年就唔係咁樣，一場普通賽事都見紅黃牌亂飛，經常突破「雙位數字」，若然逐一仔細研究，就會發覺好多時呢啲罰牌都係無必要嘅濫判。
上一輩球證例如張炎有、方有發、趙善銓等人，執法同出牌好有方寸。該位資深球員話：「以前嘅球證算係明白事理，佢哋畀牌前會事先警告，畀足機會你，如果再犯先至畀牌，咁就冇得怨。有時球員一時激動向佢哋爆粗，佢哋一係行開，一係叫你唔好再鬧，唔會郁啲就拔牌，但依家嗰啲就唔係嘞，唔好話爆粗，頂佢兩句都接受唔到。」
查實一次判罰、一張黃牌，對球證嚟講可能只係舉手間嘅事，但卻可能影響嚴重，波男認為做得球證，就要學吓好好控制ＥＱ喇！
波男